Вечерва, 15.10.2015 година, со почеток од 20.00 часот во Македонскиот народен театар свечено ќе им биде доделена Меѓународната книжевна награда „Табернакул“ на овогодишните лауреати Херта Милер и Том Стопард.

По тој повод ќе бидат промовирани и новите четири изданија на Табернакул: романот „Патничка на една нога“ и збирката есеи “Секогаш истиот снег и секогаш истиот чичко“ од Херта Милер, како и трилогијата „Брегот на Утопија“ и трите драми: „Аркадија“, „Рокенрол“ и „Тежок проблем“ од Том Стопард.

За ликот и делото на Херта Милер ќе говори Виктор Ерофеев, руски писател и претходен добитник на оваа награда, а за творештвото на Том Стопард свое обраќање ќе има Горан Стефановски.

Херта Милер (1953) е германска писателка, добитничка на Нобеловата награда за книжевност во 2009 година. Родена во Романија, работела како преведувач, а со пишување почнала уште во младоста.

Пишува романи, раскази, поезија и есеи. Нејзините дела се преведени на повеќе од дваесет јазици.

Том Стопард (1937) е британски драмски писател. Од 1997 година е носител на титула витез што ја доделува британската кралица. Роден во Чехословачка, за време на нацистичката окупација пребегнал и по Втората светска војна се преселил во Велика Британија, откако поминал три години во интернат во Индија. Работел како новинар и како театарски критичар.

Автор е на повеќе култни драми, меѓу кои е „Розенкранц и Гилденстерн се мртви“ поставена на сцената на Драмскиот театар во Скопје, како и на сценариото за филмот „Вљубениот Шекспир“.

Целта на оваа книжевна награда е да ги промовира најзначајните, светски признати книжевни вредности на македонски јазик, како и да покаже дека Македонија е земја со долга книжевна и културна традиција, земја што покажува особена почит за сите актуелни книжевни и културни глобални достигнувања.

Книжевната награда Табернакул ја претставува бронзена скулптура чиј автор е академскиот вајар Горан Стаменков. Лауреатите, исто така, добиваат и златник од Книжевната академија „Табернакул“, како и паричен износ од 5.000 евра.

*Текстот со мали измени е преземен од официјалниот настан на ФБ, кој можете да го видите тука.