Дебатите околу тоа кои се најдобрите книги на сите времиња најверојатно никогаш нема да престанат. Има толку многу книги кои имале и сè уште имаат огромно влијание врз човештвото и севкупната уметност, што е многу тешко да се определи кои се најдобрите.

Има милион различни листи од милион различни критичари, познати личности, влијателни списанија, весниици и телевизии кои исто така зборуваат за тоа кои се најдобрите книги на сите времиња. Претходно веќе имам пишувано за листата на најдобри книги во британската литература, како и за 100-те  најдобри книги на на англиски јазик според „Гардијан“. Денес ви претставувам една интересна листа на најдобрите книги на сите времиња која е производ од книгата „Најдобрите 10: Писателите ги одбираат своите омилени книги“ чиј уредник е Џ. Зејн.

Во суштина, идејата на оваа книга е да се направи сублимат од најдобрите книги според 125 писатели. Писателите како Дејвид Мичел, Стивен Кинг, Клер Месуд, Џојс Керол Оутс, Норман Мејлер и други ценети писатели на денешницата ги споделуваат најдобрите книги според нивното мислење со цел да се состави ранг-листа од најдобрите книги на сите времиња, вклучувајќи книги, поеми, драми или збирки со раскази.

Преку систем на листи и поени, на крај се сумираат резултатите и се составува листата со книги кои имале највеќе поени. Освен тоа што дава креативен и интересен увид за тоа кои се најдобри книги на сите времиња, оваа книга му овозможува на читателот да види кои дела ги обликувале умовите на некои од најдобрите писатели и писателки на денешницата.

Книгата е поделена и содржи неколку „Најдобри 10“ категории:

• Најдобрите 10 книги на сите времиња
• Најдобрите 10 книги на 20 век
• Најдобрите 10 книги на 19 век
• Најдобрите 10 книги на 18 век
• Најдобрите 10 книги на 16 и 17 век
• Најдобрите 10 книги до 15 век
• Најдобрите 10 книги од живи писател(к)и
• Најдобрите 10 книги од американски писател(к)и
• Најдобрите 10 кнниги од британски писател(к)и
• Најдобрите 10 книги од руски писатели
• Најдобрите 10 книги од француски писатели
• Најдобрите 10 мистерии и трилери
• Најдобрите 10 стрипови
• Најдобрите 10 фантазии и научно-фантастични книги

Денес одбрав на блогот да претставам неколку категории, а сите „Најдобри 10“ категории можете да ги погледнете тука. Воедно на веб-страницата можете да видите и најдете и други листи и информации со оглед на тоа дека одвреме-навреме се внесуваат некои нови листи, нови „Најдобрите 10“ од познати писатели и слични интересни работи.

Инаку, ќе забележите дека кај некои листи има и промени, односно некои се искачиле на повисоко место, некои паднале на листите и слично. Јас ги доставувам во првичната верзија, а обновените листи (иако нема некоја значителна разлика) можете да ги видите на веб-страницата. Имате можност и да си ја порачате книгата онлајн, бидејќи има можност за достава.

Освен тоа што оваа книга уште повеќе ја вжештува целата дебата за најдобрите книги на сите времиња, нуди и инспирација за тоа што да читате следно, а верувам дека одлично ќе ви послужат овие листи како инспирација, токму пред претстојниот Саем на книга.

Погледнете некои од листите:

Најдобрите 10 книги на сите времиња:

1. „Ана Каренина“ – Лав Толстој
2. „Госпоѓа Бовари“ – Гистав Флобер
3. „Војна и мир“ – Лав Толстој
4. „Големиот Гетсби“ – Ф.Скот Фицџералд
5. „Лолита“ – Владимир Набоков
6. „Мидлмарч“ – Џорџ Елиот
7. „Авантурите на Хаклбери Фин“ – Марк Твен
8. „Хамлет“ – Вилијам Шекспир
9. Приказните на Антон Чехов
10. „Моби Дик“ – Херман Мелвил

Најдобрите 10 книги на 20 век:

1. „Лолита“ – Владимир Набоков
2. „Големиот Гетсби“ – Ф. Скот Фицџералд
3. „Во потрага по изгубеното време“ – Марсел Пруст
4. „Улис“ – Џејмс Џојс
5. „Даблинци“ – Џејмс Џојс
6. „100 години самотија“ – Габриел Гарсија Маркес
7. „Врева и бес“ – Вилијам Фокнер
8. „Кон светилникот“ – Вирџинија Вулф
9. Комплетните приказни на Фланери О’Конор
10. „Абсалом, Абсалом!“ – Вилијам Фокнер

Најдобрите 10 дела на 19 век:

1. „Ана Каренина“ – Лав Толстој
2. „Госпоѓа Бовари“ – Гистав Флобер
3. „Војна и мир“ – Лав Толстој
4. „Мидлмарч“ – Џорџ Елиот
5. „Авантурите на Хаклбери Фин“ – Марк Твен
6. Приказните на Антон Чехов
7. „Моби Дик“ – Херман Мелвил
8. „Големите очекувања“ – Чарлс Дикенс
9. „Злосторство и казна“- Фјодор Достоевски
10. „Браќата Карамазови“ – Фјодор Достоевски

Најдобрите 10 мистерии и трилери:

1. „Долгото збогување“ – Рејмонд Чендлер
2. „Убиецот во мене“ – Џим Томпсон
3. „Црвениот змеј“ – Томас Харис
4. „Големата дремка“ – Рејмонд Чендлер
5. „Мислител, кројач, војник, шпион“ – Џон Ле Каре
6. „Малтешкиот сокол“ – Дашиел Хамет
7. „Милдред Пирс“ – Џејмс М. Кејн
8. „Поштарот секогаш ѕвони двапати“ – Џејмс М. Кејн
9.  „Кога јагнињата ќе стивнат“ – Томас Харис
10. „Сите плаќаат“ – Ендру Вакс

Бонус категории:

Најдобри писатели според тоа колку од нивните книги биле вклучени на листите:

1. Вилијам Шекспир — 11
2. Вилијам Фокнер — 6
3. Хенри Џејмс — 6
4. Џејн Остин — 5
5. Чарлс Дикенс — 5
6. Фјодор Достоевски — 5
7. Ернест Хемингвеј  — 5
8. Франц Кафка — 5
9. (нерешено) Џејмс Џојс, Томас Ман, Владимир Набоков, Марк Твен, Вирџинија Вулф — 4

Најдобри писатели според вкупно добиени поени:

1. Лав Толстој — 327
2. Вилијам Шекспир — 293
3. Џејмс Џојс — 194
4. Владимир Набоков  — 190
5. Фјодор Достоевски  — 177
6. Вилијам Фокнер — 173
7. Чарлс Дикенс — 168
8. Антон Чехов — 165
9. Гистав Флобер — 163
10. Џејн Остин— 161