Стивен Кинг е еден од најпопуларните писатели на денешницата. Тој има освоено над 50 книжевни награди, голем дел од неговите дела се претворени во успешни филмови и постојано пишува со полна пареа. Се смета за мајстор на хорор книгите, а ова се неговите омилени книги, книги кои мисли дека секој треба да ги прочита.
„Авантурите на Хаклбери Фин“ – Марк Твен
Марк Твен длабоко влијаел на создавањето на модерната американска книжевност и Кинг не е имун на неговата магија. Кинг тврди дека читањето на Твен било неговото „прво вреднување на човековата природа“ во книжевноста. Откако ја завршил „Авантурите на Том Соер“, Кинг не можел да застане сè додека не ги прочитал сите дела на Марк Твен.
„Сатански стихови“ – Салман Ружди
Четвртата книга на Ружди е позната по својата контроверзност, но сепак се работи за приказна со длабочина. Книгата била забранувана и палена во голем дел од земјите од Блискиот Исток, а главните челници во Иран ја барале главата на Ружди поради неговото портретирање на пророкот Мухамед. И покрај лутината и бесот, оваа книга била номинирана за многу престижни награди. Ова е приказна за нереалното патување на двајца луѓе кои се обидуваат да си го средат животот.
„Господар на мувите“ – Вилијам Голдинг
Кинг толку многу ја сака оваа книга што го има напишано воведот во едно од поновите изданија. Во воведниот есеј, тој зорува за тоа како првпат ја одбрал книгата од еден „Букмобил“. Тој потоа продолжува да зборува за тоа како оваа приказна ги покажува различните страни на децата: „Дали можеме да бидеме добри? Да. Дали можеме да бидеме љубезни? Пак да. Дали, можеме за само еден миг да станеме малечки чудовишта? Секако дека можеме.“ Оваа книга на Голдинг дава прецизни описи на децата, помешани со стравот и слободата која доаѓа со големите патувања.
„Мрачна куќа“ – Чарлс Дикенс
Кинг го сака Дикенс поради неговите ликови и екстензивни приказни, нешто што е карактеристика и за пишувањето на Кинг. Влијанието на Дикенс врз Стивен Кинг е очигледно со оглед на тоа дека постојано ги споредуваат. „Мрачна куќа“ е едно од најобемното дело на Дикенс со преку 60 поглавја и повеќе подзаплети.
„Крвавиот меридијан“ – Кормак МекКарти
Другиот жив мајстор на стравот и едно од најважните дела помеѓу хорор книгите, „Крвавиот меридијан“ е модерно ремек-дело. Брутално и непростливо патување низ боиштата во Тексас и Мексико низ кои се движи еден од најстрашните негативци на сите времиња, Судијата. Ако ви се допаѓаат делата на Стивен Кинг, не заборавајте да го прочитате овој епски хорор.