Џејмс Џојс е роден на 2 февруари 1882 година и е еден од најпознатите ирски писатели. Неговата книга „Улис“ предизвикала вистинска контроверзија кога била издадена, а со години била забранувана во САД и Велика Британија и други земји ширум светот.

Неговиот револуционерен стил на пишување и експериментално користење на јазикот му помогнале да стекне обожаватели ширум светот и по неговата смрт во 1941 година. Џејмс Џојс се смета за еден од највлијателните и најважните писатели во 20 век.

Во негова чест, денес на блогот можете да прочитате интересни факти за овој писател.

Блумсдеј навистина постои

Доколку не сте знаеле, еве добра можност да дознаете дека 16 јуни е Блумсдеј. Ова е денот во кој се случуваат сите дејствија во „Улис“. Името на денот доаѓа од Леополд Блум, главниот лик во книгата.

Но, зошто баш 16 јуни?

Се разбира, Џојс не го лупнал датумот така од прва. На 16 јуни тој за првпат излегол со Нора Барнакл, која подоцна ќе стане негова жена.

Нивната врска била прилично страствена

Денешните тинејџери мислат дека тие ги измислиле сите тие секси допишувања, но кога писмата кои Џејмс Џојс и ги праќал на Нора биле продадени на аукција во 2004 година, нивната содржина била прилично експлицитна. Една од поблагите реченици во писмата била следнава: „Моите омилени делови од твоето тело се оние кои ги прават срамотните работи.“

Имале две деца (и Барнакл имала барем еден спонтан абортус)

Иако не се знаат детали за Џорџио Џојс, бидејќи нивната ќерка Лусија Џојс била поинтересна за историчарите. Таа одела на часови по балет со Исидора Данкан, била во врска со Семјуел Бекет, била прогласена за шизофреничарка и била пациент на Карл Јунг.

Џојс имал некои многу чудни фобии

Џојс бил нападнат од комшиско куче кога бил мал, а тоа водело кон доживотен страв од кучиња, но тој исто така имал фобија од громови (кераунофобија) која ја добил откако неговата религиозна тетка му рекла дека громот е всушност лутиот Бог кој го покажува неговиот бес.

Џејмс Џојс и Вирџинија Вулф

Џејмс Џојс и Вирџинија Вулф биле револуционерни писатели, но тие двајца делеле и многу други сличности. Двајцата се родиле и умреле во иста година. И двајцата објавиле револуционерни модернистички романи во 20-тите години чиешто дејство се случува во текот на еден ден („Улис“ и „Госпоѓа Даловеј“), а тоа водело кон тоа и двајцата да се сметаат за пионери во струјата на пишување за свесноста.

Но, Вирџинија Вулф е позната по тоа што не била баш воодушевена од „Улис“. Во една прилика изјавила: „„Улис“ е дело на несигурен студент кој си ги чеша мозолчињата.“

„Најдобрата“ вечера на сите времиња

Во 1922 година, годината кога „Улис“ излегла на книжевниот пазар, Џојс и Марсел Пруст биле заедно на вечера, а на истата вечера биле пристуни и Пабло Пикасо и Игор Ставински. Сите биле љубопитни за тоа што би разговарале овие двајца писатели, но сите набргу се разочарале затоа што разговорот бил прилично досаден.

Целиот разговор поминал во жалење од страна на Пруст и Џојс. Џојс се жалел на постојаните главоболки и проблеми со очите, а Пруст се жалел на стомакот кој го измачувал. И на крај, Пруст признал дека ги нема прочитано делата на Џојс и Џојс признал дека ги нема прочитано делата на Пруст. Легендата вели дека на крај делеле такси и Пруст излегол од таксито без да го плати својот дел.

Зарем никој не разбира?

Ова наводно се последните зборови на Џојс пред да почине на 13 јануари 1941 година.