Дали сте знаеле дека Ден Браун, авторот на бестселерот „Кодот на ДаВинчи“, има голема пасија за окултни и малку познати религиски книги и артефакти? Па добро, имајќи ги предвид темите во неговите романи, можеби и не е толку големо изненадување фактот дека познатиот автор ужива во ваква литература и тематика.

Дури и ако некому било тоа непознато, писателот реши да го обелодени преку донација од 300.000 евра на библиотеката „Ритман“ во Амстердам, позната и како Куќа на живитите книги Bibliotheca Philosophica Hermetica .

Оваа донација ќе ѝ овозможи на библиотеката да дигитализира илјадници текстови кои датираат уште од пред 19 век, а се поврзани со алхемија, астрологија, магија и теософија. Меѓу останатите ракописи, во дигитална верзија ќе може да се најдат и „Corpus Hermeticum“ (1472), Spaccio de la bestia trionfante на Џордано Бруно од 1584 година, како и првата испечатена верзија на дрвото на животот: графичка презентација на Сефирот или 10-те Божји доблести според Кабалата, текст којшто датира од 1516 година.

Од библиотеката изјавија дека „Браун има голема почит за библиотеката“. Браун во неколку наврати ја има посетено библиотеката, особено во периодот кога ги пишувал неговите романи „Изгубениот симбол“ и „Инферно“, а сега се обидува да ѝ се одолжи на библиотеката на свој начин. Околу 3500 антички книги ќе бидат достапни на интернет и тоа на архива која ќе се вика: „Херметички отворено“.

Во продолжение погледнете го трејлерот за претстојниот документарец за библиотеката „Ритман“, која била основана од Јуст Р. Ритман во 1984 година. Библиотеката содржи повеќе од 20.000 книги кои покриваат различни теми како мистицизам, духовност, религија, алхемија, гностицизам, а благодарение на Ден Браун, голем дел од оваа збирка наскоро ќе биде достапна за сите!