Нов месец, нови можности за читање нови книги.

Многумина токму во јули ќе одат на одмор, па можеби некој од овие предлози ќе ви го привлече вниманието!

„Чиста анархија“ – Вуди Ален

Оцена: 3.5/5
Осврт: Секој кој барем малку е запознаен со филмското творештво на Вуди Ален, знае дека Вуди Ален е сосема поинаков и невообичаен во своето творештво. Па не треба да очекувате ништо помалку и од оваа збирка раскази која сосема соодветствува со насловот. Луцидноста и ексцентричноста на неговото пишување сосема доаѓаат до израз тука преку различните раскази. Неговиот сарказам и иронија ќе ве насмејат, а ќе најдете и неколку интересни поенти под површината на самите раскази. Се разбира, како и во секоја збирка, некои раскази се подобри, некои можеби нема да ви фатат око, но во секој случај вреди да ја земете оваа книга во рака и да продрете малку во умот и светот на Вуди Ален.

ИЗДАВАЧКА КУЌА: ИЛИ-ИЛИ

„Жената на прозорецот“ – А.Џ. Фин

Оцена: 2.5/5
Осврт: Оваа книга направи вистинска експлозија кога излезе, имаше одлична PR кампања, но во суштина не е ништо повеќе од просечните трилери кои досега сме ги читале. Ана е главниот лик во оваа книга, која по една несреќа престанува да излегува од својот дом, па така има многу слободно време да чита, да седи на интернет, да пие вино и да ги шпионира своите соседи. Во една прилика се запознава со својата сосетка и нејзиниот син, а една вечер е сведок на една ужасна сцена, но никој не и верува на зборот бидејќи истата вечер пие апчиња во комбинација со алкохол и нејзото помнење не е баш најјасно. И таа е решена да ја дознае вистината. Она што не ме воодушеви кај оваа книга е тоа што веќе како по шаблон се прават трилерите. Ако ви треба лесно четиво, дајте ѝ шанса на оваа книга.

ИЗДАВАЧКА КУЌА: САКАМ КНИГИ

„Зборови“ – Жан-Пол Сартр

Оцена: 4.5/5
Осврт: Во последно време уживам да читам извадоци и размислувања на Сартр кој навистина ме фасцинира со своето пишување, па така навистина се израдував кога налетав на оваа книга и уживав во секоја страна. Она што ја прави оваа книга посебна е што самиот Сартр се става себеси на тапет и ни дозволува да навлеземе и да ѕирнеме во многу емоционално интимни делови од неговиот живот – неговото детство. И секако – зборовите, зборовите и нивното влијание врз него, но кога ќе навлеземе во подлабоката суштина, читателот може да се поврзе на начин што и тој самиот ќе размисли за тоа колку зборовите, јазикот и книгите имале и имаат влијание врз неговиот живот. Дури и да не сте љубител на филозофија, оваа книга ќе ве допре на посебен начин.

ИЗДАВАЧКА КУЌА: ПОЛИЦА

„Светот на рамена“ – Џенифер Нивен

Оцена: 2/5
Осврт: Доколку сте во потрага по лесно четиво за на плажа, ова е таква книга. Се работи за двајца средношколци, Либи и Џек. Либи по смртта на нејзината мајка паѓа во депресија и јаде до степен да мораат да ја извадат од нејзината куќа со кран, а потоа минува низ терапии и конечно почнува одново да го гради својот живот. Џек е популарно момче кое има ретко нарушување поради кое не помни лица, дури и лицата на неговите најблиски. По игра на случајност, тие се запознаваат и оттука почнува да се развива приказната. Очекував малку повеќе длабочина, но не е лоша за опуштање од секојдневните обврски.

ИЗДАВАЧКА КУЌА: АРС ЛАМИНА