Романската поетеса Ана Бландијана е добитничка на „Златен венец“ на овогодинешните „Струшки вечери на поезијата“. На вчерашната Свечена седница која се одржа во МАНУ, Управниот одбор и Дирекцијата на фестивалот официјално ја објавија одлуката и ја споделија со јавноста. Наградата на годинашната лауреатка ќе ѝ биде врачена на поетското читање „Мостови“.

Струшките вечери на поезијата годинава ќе се одржат во периодот од 21 до 28 август.

Како што се наведува на веб страната на Струшките вечери на поезијата:

„Една од најценетите современи европски авторки, Ана Бландијана, (псевдоним, зад кој се крие името на Отилија Валерија Коман) е припадничка и претставник на поетската генерација од 60 –тите години, која е заслужна за афирмацијата на модернизмот во романската литература и поезија.

Поезијата на Бландијана не флертува со помодното и површно допадливото пишување, таа е критички настроена и суштински загрижена заради губитокот и отсуството на слобода во современо-историската бездна, сред која е стаписано човештвото…

Како што сведочат книжевно критичките реакции и одгласи ширум Европа – творештво на Ана Бландијана претставува значен придонес во збогатувањето на изразните потенцијали на современата литература, како и витален поттик за ревитализација на нејзината благородна мисија во едно сурово време, какво што е нашето“, образлагајќи ја одлуката, нагласи проф. д-р Елизабета Шелева, претседател на Управниот одбор на „Струшките вечери на поезијата“, еден од најреномирани и најстарите поетски фестивали во светот.“

Честитки за Ана Бландијана и секако со душа ги чекаме и овогодинешните Струшки вечери на поезијата!

Повеќе за биографијата и творештвото на Ана Бландијана можете да прочитате тука.