Венко Андоновски е еден од најистакнатите и најдокажаните македонски автори. Неговите книги се вистински бестселери и тој има навистина многу читатели кои со нетрпение чекаат и се радуваат на секое ново издадено дело.

Изминатиот период беше одличен за Венко Андоновски. Тој ја промовираше својата нова книга „Припитомување на кучката“ во издание на „ТРИ“, а беше номиниран и за престижната Толстоева награда во Русија.

Дополнително, успесите на Венко Андоновски не запираат тука. Познатиот српски издавач „Лагуна“ ги доби правата да ја издаде „Папокот на светот“ на српски јазик.

(Извор на сликата: Фокус)

На веб-страната на „Лагуна“, романот е веќе достапен за продажба. Како што се наведува на веб-страната, исто како и на самата корица, се работи за „современ класик на македонската книжевност“. Освен тоа, на задната страна на корицата се цитира извадок од предговорот на руското издание на романот кој вели: „Без сомневање, Андоновски може да се нарече и гениј, жив класик и книжевен џин, а романот може да се спореди и со делата на Умберто Еко и Милан Кундера.“

Според информациите, издавачката куќа „Лагуна“ ќе ги преведе и издаде и останатите романи на Венко Андоновски.

Честитки, да се надеваме на одлична продажба и нови преводи!

Извори:
Фокус
Издавачка куќа „Лагуна“