Некаде на крајот на август, Градска библиотека „Браќа Миладиновци“ објави дека започнува нова кампања, „Читаме современи македонски автори“ со цел да ја крене свесноста и да ги поттикне македонските читатели да читаат македонски современи автори. Па така, замислата е секој месец да се прогласува книга на месецот, која читателите ќе ја читаат, а потоа замислата е книгите да се дискутираат на Клубот на читатели, а се организираат и средби со зададените автори и авторки.

Засега кампањата се одвива одлично, првата книга на месецот, со која и започна кампањата, беше „Сфинга на гневот“ на Жарко Кујунџиски, а „Девет приказни за госпоѓица Сит“ од Билјана С. Црвенковска беше книга на месец октомври. За книга за овој месец прогласен е одличниот роман „Диссомнии“ на Игор Станојоски, за кој имам пишувано и на блогот.

По тој повод, денес (7 ноември), со почеток од 19 часот, во Спомен-соба „Т’га за југ“ во Градска библиотека „Браќа Миладиновци“ ќе се одржи средба со авторот Игор Станојоски. Како што се наведува на официјалниот настан на Фејсбук, „промоцијата и доближувањето на насловите до читателската публика е и преку дијалог со авторот за процесот на создавање на делото, за неговите творечки дилеми, за живото на делото по објавувањето и слично.“ Разговорот со Игор Станојоски ќе го води книжевната критичарка Александра Јуруковска, а фрагменти од делото ќе чита актерот Андреј Серафимовски.

За романот „Диссомнии“, Станојоски ја добива наградата „Рационово признание“ во 2018 година. Романот досега има три изданија во Македонија, а издаден е и на босански јазик во издавачката куќа Бајбук во превод на Сеида Бегановиќ.

За повеќе информации, следете ја официјалната Фејсбук страница на Градска библиотека „Браќа Миладиновци“.