Денес, 19 април, со почеток од 20 часот, во киното „Милениум“ ќе се одржи премирата на првиот долгометражен документарен филм за Блаже Конески насловен како „Јанѕа“ направен под режисерската палка на истакнатиот македонски документарист, Никола Т. Калајџиски, кој истовремено е и сценарист на филмот.

Документарниот филм е создаден според мотиви од „Дневник по многу години“ на Конески, а е подготвен во продукција на „Контраст филм“, додека пак продуцент е Златко Димески. Монтажата е на Аристид Филактов, додека композитор на музиката е Златан Миливоевиќ, а дизајнер на звук е Дарко Спасовски. Како директори на фотографија се јавуваат Дејан Димески и Петар Кочишки.

Како што е наведено во соопштението за денешната премиера, „Јанѕа“ е подготвуван и сниман во период од три години и го следи животот и делото на професорот, академик, поет и еден од кодификаторите на македонскиот литературен јазик, Блаже Конески. Огромното значење на делото на Конески за македонската култура и наука и воопшто за нашата држава се претставува преку кажувањата на повеќе истакнати академици, универзитетски професори и воопшто научници/истражувачи од областа на македонистиката и воопшто од областа на лингвистиката, книжевната наука и културологијата, вклучително и странски македонисти кои важат за познавачи на делото на великанот – негови современици и потомци. 

Како што е наведено на порталот „Култура“, сценаристот и режисер на филмот, познатиот документарист Калајџиски, зад себе има кариера со голем број документарни филмови кои се прикажувани на домашни и меѓународни фестивали. Овој негов најнов филм, посветен на централната личност на македонскиот XX век, се очекува да фрли нова светлина врз ликот и делото на Конески, затоа што не само што во целост го претставува неговиот влог за македонската култура и наука, како и воопшто за современата македонска држава, туку опфаќа и димензии на неговата личност кои не се многу коментирани во досегашните осврнувања за великанот и малку познати сегменти од неговата биографија.  

Филмот се остварува сo поддршка од Агенцијата за филм.

Подолу погледнете го и целосниот постер за филмот.

Извор.