Неодамна издавачката куќа „Антолог“ објави дека по повод 25 години од нивното постоење, подготвуваат издавање на многу класици и одлични изданија, а една од најавите беше издавањето на книгата „Автопортрет со седум прсти“ од Ацо Шопов, збирка од прозни записи на еден од најголемите македонски поети и книжевници.

Во најновото соопштение објавено на нивната веб-страница, „Антолог“ информираат дека книгата веќе може да се најде на нивните полици, и можете да си ја набавите во нивната книжарница или преку нивната веб-страница. Како што се наведува во соопштението, „на речиси шестотини страници се провлекуваат неговите размисли за поезијата, литературата, уметноста, културата, општеството и историјата, забележани во македонските, југословенските и во странски весници и списанија, од почетокот на четириесеттите до крајот на седумдесеттите години на дваесеттиот век.“ Насловната корица на книгата е авторство на Марко Трпески, а графичкото уредување на Бобан Здравковски Андреевски.

Меѓу останатото, во соопштението се наведува и дека „неговиот автопортрет во издание на „Антолог“ е во најмала рака изненадувачки, затоа што колку што широката публика го познава суптилниот лиричар, толку е слабо упатена во  другите книжевни и општествени дејноси на Шопов, кој во оваа книга се покажува како исклучителен есеист и беседник со изострен слух за литературата, ликовната уметност и филмот, како сериозен толкувач и критичар на општествените текови и драми, како строг полемичар, како ангажиран издавач и интелектуален работник.“

Како повод објавувањето на ова издание, во вторник, 19 март, со почеток од 19 часот, во Лабораториум (бул. „Климент Охридски“ бр. 68, Скопје), се организира и промоција на истото кое ќе биде претставено од страна на проф. д-р Владимир Мартиновски, декан на Филолошкиот факултет „Блаже Конески“ и нашиот легендарен актер, Никола Ристановски. Дополнително, на промоцијата ќе се обрати и Јасмина Шопова, приредувачка на книгата и потпретседателка на фондацијата „Ацо Шопов – Поезија“ која ја организира промоцијата во соработка со „Антолог“ и „Лабораториум“.

Како што се вели во соопштението на „Антолог“ и на официјалниот настан на Фејсбук за оваа промоција, кон промоцијата се приклучуваат и Националната опера и балет, ФлипБук – Фестивалот на анимирани филмови и ДЛУМ, со сегменти од нивните уметнички продукции во рамките на „2023, Година во чест на Ацо Шопов“.

Извори:
Веб-страница на „Антолог“
Официјален настан на Фејсбук по повод промоцијата