Силвија Плат е една од најпознатите поетеси на 20 век. Во својот краток живот таа изврши неверојатно влијание врз поезијата. Се наближува годишнината од нејзинoто раѓање (27 октомври 1932 година), па во нејзина чест, ѕирнете во некои од нејзините лични работи што годинава беа дел од една изложба на Меѓународниот саем на стари книги во Њујорк. Компанијата за ретки книги „Type Punch Matrix“ ги обезбедила и благодарение на нив јавноста може да ги погледне овие предмети, а книжевниот портал „LitHub” пренесе дел од нив.

Збирката вклучува портрет на Плат насликан кога имала шеснасет години, рачно напишана песна, нејзиниот прв професионален договор за пишување за списанието „Seventeen“, кој бил склучен кога и самата Плат имала седумнаесет години, како и книги од нејзината библиотека, вклучувајќи „силно означен и подвлечен“ примерок на „Трагедијата не е доволна“ на Карл Јасперс, која вклучува две значајни прибелешки – првата се однесува на нејзиниот обид за самоубиство во 1953 година, а во втората е подвлечена дискусијата на Џаспер за Просперо и Ариел. „Овој дел бил подвлечен од Плат десет години пред да се појави нејзината збирка „Ариел““, изјавил коосновачот на „Type Punch Matrix“, Брајан Кесиди во соопштението за јавност. „На многу начини, можете да ги видите почетоците на нејзините две најпознати книги токму овде“.

„Поголемиот дел од овој материјал бил купен од претходниот сопственик директно од мајката на Силвија, Аурелија, која била лична пријателка на купувачот“, според основачката на „Type Punch Matrix“, Ребека Ромни. „Мајката на Плат добивала малку пари од сè попрофитабилниот имот на Плат, кој бил под контрола на нејзиниот сопруг, поетот Тед Хјуз, па таа повремено ги продавала личните предмети на Плат за да го дополни нејзиниот приход“.

Премиерната изложба беше во април 2024 година, и иако можеби не би имале можност да ја погледнеме во живо, сепак подолу ѕирнете дел од работите што биле изложени:

~ Од примерокот со белешки на Силвија Плат од книгата за трагедијата што таа ја користела на Кембриџ, „Трагедијата не е доволна“ од Карл Јасперс (1953) – со маргинални белешки кои го поврзуваат текстот со нејзиниот сопствен нервен слом од 1953 година овековечен во „Стаклено ѕвоно“ и пророчкиот опис на „Ариел“ како поет.
Извор: Type Punch Matrix

~ Уште една книга од домашната библиотека на Плат, „Белиот остров“ (1940) од Керолин Дејл Снедекер, потпишана двапати од Плат со оригинален цртеж од неа. Таа го прочитала во своите рани дваесетти години и се работи за роман за една млада девојка од Рим протерана на влажните брегови на Британија и оптоварена со мајка по име Аурелија која е буквалистка.
Извор: Type Punch Matrix

~ Оригинален потпишан договор со списанието „Seventeen“ кои го откупиле нејзиниот расказ „Летото никогаш повторно нема да дојде“, објавен кога Плат имала само седумнаесет години.
Извор: Type Punch Matrix

~ Прекрасен оригинален портрет насликан од Силвија Плат кога имала само 16 години. Пред да се насочи кон поезијата, таа сериозно размислувала да се насочи кон сликарството. 
Извор: Type Punch Matrix

~ Оригинален потпишан ракопис на една од најраните песни на Плат: „Ѕвездата снегулка”, завршена во 1945 година, кога уште немала ни полни 14 години. 
Извор: Type Punch Matrix

~ Вистинско прво издание на „Стаклено ѕвоно” во Велика Британија од 1963 година. Таа првично го објавила романот таму под псевдонимот Викторија Лукас.
Извор: Type Punch Matrix

Првичната верзија на збирката „Ариел” пред да биде официјално објавена.
Извор: Type Punch Matrix

Извор.