Денес, токму на годишнината од смртта на македонскиот поет Анте Поповски, со почеток од 19 часот, ќе се одржи  централниот настан на осмото издание на меѓународната поетско-културна манифестација „Анте Поповски – Антево перо“. Настанот ќе се одржи во Музејот на македонската борба за самостојност во Скопје.

Како што се наведува во соопштението објавено на Фејсбук страницата „Анте Поповски – Антево перо“, на почетокот на вечерта, присутните ќе имаат можност да проследат куса аудио снимка со гласот на Анте Поповски.

Александра Јуруковска ќе ја води програмата и ќе започне со кус приказ на најважните карактеристики на годинешниот конкурс.

Д-р Атина Цветаноска, членка на жири-комисијата ќе се осврне на естетските вредности на збирките на добитнците на традиционалните поетски награди, „Антево перо“, „Антев златник“ и „Антев часовник“, по што ќе следи и врачување на наградите.

Публиката ќе проследи и поетско читање, на кое ќе се претстават годинешните лауреати и авторите кои влегоа во потесниот избор за наградите.

На крајот од вечерта Жорж и Александар Поповски од Здружението за зачувување на делото на Анте Поповски ќе ги презентираат останатите активности во рамки на Манифестацијата.