Британскиот музичар Стормзи верува дека читањето не е само хоби – туку вистинска животна супермоќ. Токму затоа, тој се приклучи кон иницијатива што има за цел да ги охрабри луѓето кои не се сметаат себеси за читатели повторно да посегнат по книга. Како што објави весникот „Гардијан“, издавачката куќа на Стормзи, #Merky Books (дел од издавачката куќа „Пингвин“), учествува во овогодинешното издание на програмата Quick Reads („Брзи четива“) – проект што веќе две децении создава кратки и лесно читливи книги наменети за луѓе кои ретко читаат, имаат проблем со концентрацијата или се враќаат кон читањето по подолга пауза.

(Извор: Capital)

Книги создадени за „нови“ читатели

Во рамките на овогодинешната иницијатива ќе бидат објавени шест книги со пристапна должина и содржина, кои ќе се продаваат по симболична цена од една фунта. Насловот што го објавува #Merky Books е романот „Болки на гладните“ од писателот Дерек Овусу.

Стормзи вели дека неговата врска со книгите започнала уште во младоста – и никогаш не завршила.

„Читањето ми помогна кога бев младо момче, а ми помага и денес. Книгите имаат моќ да те водат низ животот,“ изјавил музичарот, додавајќи дека е особено горд што токму Овусу е дел од оваа иницијатива. Според него, зборовите на авторот имаат потенцијал да стигнат до луѓето на кои им се најпотребни.

Тој испрати и порака до сите што ретко читаат:

„Ги охрабрувам сите што не читаат често да посегнат по книга од едицијата „Брзи четива“, затоа што читањето навистина е супермоќ. И музиката и книгите се начин да го пронајдеш сопствениот глас. Сите сме составени од приказни, тие нè дефинираат.“

Приказна за опсесијата и современите притисоци

Романот „Болки на гладните“, кој има 128 страници, ја следи приказната на Реј, човек опседнат со фитнесот, чија страст постепено прераснува во опасна зависност. Во потрага по поддршка, тој се приклучува на ризична дигитална заедница, додека неговата партнерка Теми, новинарка, загрижено го набљудува неговото однесување.

Овусу признава дека самиот започнал да чита релативно доцна, на 24 години, и верува дека ваквите иницијативи можат значително да помогнат.

„Книгите од едицијата „Брзи четива“ се достапни, евтини и ненаметливи. Тие им овозможуваат на луѓето постепено да ја откријат радоста и исполнетоста што ја носи читањето,“ вели авторот. Тој додава дека е горд што учествува во проект кој им помага на луѓето повторно да стекнат самодоверба при читањето.

Книги што стигнуваат до сите

Оваа година, според „Гардијан“, „Брзи четива“ ќе направи уште еден важен чекор – дел од насловите за првпат ќе бидат објавени и како аудиокниги. Дополнително, половина милион примероци ќе бидат донирани во затворите низ Обединетото Кралство. Сите книги од програмата минуваат низ детална проверка за пристапност: се тестира нивната читливост, должина и соодветност за возрасни кои повторно градат навика за читање.

Покрај „Болки на гладните“, годинава ќе бидат објавени и следниве наслови:

• „Последната клупа“ – Кармел Харингтон
• „Девојката на сликата“ – Рејчел Хор
• „Жената од соседната куќа“ – Луиз Џенсен
• „Слатка добротворност“ – Рози Гудвин
• „Ќелија 1“ – Леје Аденле

Иницијативи како „Брзи четива“ потсетуваат дека читањето не мора да биде предизвик или обврска – понекогаш е доволна една кратка приказна за повторно да се разбуди љубовта кон книгите.

Извор.