Нов месец, нови можности за читање! Доколку барате некоја нова книга за читање, можеби некои од овие предлози ќе ви фатат око. Па да видиме, што читаше Кафе и книги во мај?

„Приказна за едно семејство“ – Роза Вентрела

Издавачка куќа: АРС ЛИБРИС
Оцена: 5/5
Осврт: Доколку сте љубител на прозата на Елена Феранте, голема е шансата дека ќе ви се допадне и оваа книга. Се работи за приказна раскажана од перспективата на младата Марија која расте во куќа со двајца постари браќа и татко со незгоден карактер.

Книгата го опишува нејзиното растење и развој, нејзиниот поглед на нејзиното градче и нејзиното соседство, полно со различни ликови – и позитивни и негативни. Многу е интересно да се погледне животот и перспективата од аспект на девојче кое полека расте и се претвора во млада жена.

Одлична проза, одлично напишана книга, навистина ви ја препорачувам, особено е одлична за овие летни денови, страниците некако сами летаат и ве пренесува директно во светот кој го создава!

„Медеја“ – Л.А.Сенека

Издавачка куќа: ИЛИ – ИЛИ
Оцена: 5/5
Осврт: Интензивна, одлична, неверојатна трагедија! Оваа трагедија е заснована на легендата за Медеја која веќе била обработувана во неколку класични дела, но сепак во себе содржи посебна страст, енергија и интензивност.

Преводот е одличен, па читателот може во секој момент да го доживее секое чувство, особено гневот и бесот на Медеја, кој како да не познава никакви граници, што резултира и со одличната сцена на крајот.

Додека читате, сфаќате дека без оглед на тоа колку одамна се напишани некои дела, тие се класици и универзални поради тематиките кои ги обработуваат, толку човечки и непроменливи. Се работи за навистина кратко четиво, но е толку интензивно, што нема да сакате да ја спуштите додека не ја прочитате!

„Сапиенс: Кратка историја на човечкиот род“ – Јувал Ноа Харари

Издавачка куќа: ТРИ
Оцена: 4.5/5
Осврт: Оваа книга направи вистински бум на книжевната сцена кога се појави. Беше препорачувана од еден куп познати личности како Марк Цукенберг, Бил Гејтс и уште многу други. Харари во оваа книга прави едно резиме на историјата на човечкиот род, уште од времињата кога се појавиле неандрталците и хомо сапиенсот.

Тој истражува што е тоа што го направило сапиенсот она што е денес, како човештвото се развивало и кои се главните причини за развојот, но и за деструкцијата која човекот ја приредил.

Одлична книга, полна со многу корисни и интересни информации. Бара малку повеќе посветување и фокус, но вреди за секоја минута и страница која ќе ја прочитате!

„Календар на моето детство“ – Ѓорѓе Балашевиќ

Издавачка куќа: Балбело
Оцена: 4.5/5
Осврт: Како што веќе можеби некои читатели знаат, јас сум голем обожавател на ликот и делото на Ѓорѓе Балашевиќ и веќе неколку пати давав предлози за неговите дела.

И овојпат Џоле нема промашување. Ова ми се чини дека му е можеби и најхумористичната книга од сите кои досега ги има напишано, честопати се смеев на глас. Добро познатиот глас на Балашевиќ е присутен и тука, доловувајќи ги згодите и незгодите во семејството на главниот јунак, преку неговите детски спомени, кои често се и најискрени.

Додека читате, не може, а да не ве фати малку носталгија и по сопственото детство. Топла, емотивна и прекрасна книга, онака како што само Балашевиќ може.

„Само најсекси маж кој постои“ – Џули Џејмс

Издавачка куќа: САКАМ КНИГИ
Оцена: 4/5
Осврт: Џули Џејмс е одлична писателка која пишува романи кои се одлични доколку ви е потребна малку романтична нишка во вашиот живот и малку забава. Секогаш кога имам потреба да се одморам од реалниот живот и да читам нешто со поведри ноти, Џули Џејмс е авторката која сакам да ја читам.

Се работи за интересна и забавна книга, за искрата и хемијата која се појавува помеѓу Тејлор Донован, супер успешна адвокатка, и Џејсон Ендрус, познат холивудски актер.

Тие двајца се запознаваат кога Тејлор добива задача да го подучи за судења и адвокатура, за неговиот следен филм, но уште од старт нивните силни карактери доаѓаат до израз. Забавна, хумористична книга, која ќе ви ги оттргне мислите од здодевното секојдневие и е одлична доколку барате книга за одмор!